Rubježny hród je 540,5 metrow wysoka hora w prěnim rjećazu Hornjołužiskich horin na juhowuchodźe Budyskeho wokrjesa při hranicy ze Zhorjelskim wokrjesom. Wón twori wuchodny „róžkowy stołp“ Čornobóskeho rjećaza a nadeńdźe so mjez Wuježkom na sewjerozapadźe, Žornosykami na sewjeru a Dažinkom na juhowuchodźe w třiróžku gmejnow Bukecy, Lěwałd a Kumwałd. Najbliši susodny wjerch na zapadźe je Čornobóh sam.